الخميس، 23 يوليو 2020

محمد العميد يكتب " رسالة للبعض وفيها الخلاصة "

محمد العميد **

عايزين تسيبو السياحة ؟ سيبوها وامشو بس مترجعولهاش تاني .. مترجعولهاش لما تسترد عافيتها وتشتغل أحسن من الأول عايزين تسيبو القطاع سيبوه بدون ما تضرو حد .
أنت تجربتك في المجال كانت فاشلة عشان حضرتك دخلته سبوبة عشان فلوسه مش عشان حضرتك بتحبه وخلينا واقعين  .. عايز تمشي أمشي من غير ما تكسر شوية الطموح أللي عند زميل تاني ليك ومصمم يكمل وعارف أنه هينجح .. متتخليهوش ييأس يا أخي وسيبه ...


مجال السياحة " أللي بقا فيه كخه دلوقتي " والبعض بيقول عنه زبالة ومجال واقع .. هو نفسه المجال أللي أكل حضرتك الشهد .. أللي خلي حضرتك تعمل مكاسب مكنتش تحلم بيها في عزك.. مجال السياحة أللي بتتريقو عليه دلوقتي ومش عايزين تقفو معاه لحد ما يرجع .. هو نفس المجال أللي شبه دار الأيتام أللي لم الكل لم السواق ولم المقاول ولم السمسار والتاجر وكتير غيرهم أللي ميعرفوش عن السياحة حاجة غير أنها طيران وفندق وخلاهم يبقو مديرين ويطلعو من تحتهم جيل ياحصرتي عليه اقسم بالله .. جيل لا يعرف يعني أيه يحترم المجال ولا يعرف معني لكرسي الإدارة غير أنه منصب وبس ..  ومع احترامي لكل المهن دي فوق راسي وشرف للكل ..

 بس المثل زمان قال " أدي العيش لخبازه " .. حضراتكم دخلتوه خربتوه وجبتو ضٌرفه ودلوقتي لما وقع بقا مجال وحش ؟؟؟ أومال دخلتو ليه لما كان في "عزه" وفيه فلوس ؟
ولا هو حلو لما يكون شغال وكخة لما يقف ..

بسم الله ماشاء الله علي حضراتكم دخلتو المجال جبتوه الأرض ..  حضرتك معاك فلوس بالله عليك شغلها بره وأبعد عن المجال ده عشان المجال ده محتاج حد يزوقه لقدام .. ويديه تنفس ويقومه مش محتاج سمسمرة ولا أي مصالح .. أللي داخل المجال بقرشين عشان يستثمر ويكسب بالله عليك أمشي وأبعد وشوف مجال تاني عشان بسببكم بيوت كتير خربت ...

مجال السياحة " ده أللي أنتو داخلينه سبوبة "  بالنسة للناس أللي فيه هو بيتهم وأهلهم وعيلتهم المجال أللي بنقعد فيه في الشغل باليومين والتلاتة مطبقين وسط أصحابنا وجبايبنا ومبنزعلش ، بالعكس بنفرح بلمتنا ووجودنا جنب بعض .. مجال السياحة " أللي دخلناه أغراب عن بعض وعرفنا فيه ناس بنقضي معاهم وقت أكتر مابنقضيه مع أهلنا " ..

مجال السياحة أللي فيه بنلف كل محافظات الدولة وبنعرف فيه كل الناس مجال السياحة أللي عرفنا فيه ناس بقيو أكتر من أهلنا .. مجال السياحة أللي لو خسرنا فيه مبنزعلش ع الفلوس ونقول هتتعوض يكفينا بس أننا وسط ناس بنحبها ومجال بيعرف يحتوينا  ..

مجال السياحة أللي مهما تعبنا منه مبنقدرش نستغني عنه .. المجال ده حضرتك مش مجرد شغل ومكسب وبس .. السياحة دي حياة تانية ميعرفش قيمتها غير أللي بيحبها ..

*** السياحة بتتولد من جديد كل واحد يرجع لمكانه .. وسيب القطاع لأهله بالله عليكم وكفاية الطحن والفرمة أللي أتفرمناها ..

**محمد العميد مؤسس صفحة " مجتمع السياحة /  "Tourism society